പിണറായി- കണ്ണന്താനം മാതൃക

കേരളത്തിലെ, വിശിഷ്യാ കണ്ണൂരിലെ സഖാക്കളോടും സംഘാക്കളോടും ഒരു അഭ്യര്‍ത്ഥന..

നിങ്ങൾ പരസ്പരം വെട്ടിക്കീറാൻ ഇറങ്ങുന്നതിനു മുമ്പ് ഒരു നിമിഷം അങ്ങ് ഡൽഹിയിലെ കേരള ഹൗസിൽ വച്ച് താൻ നൽകിയ സൽകാരം കൈക്കൊള്ളാൻ വന്ന അൽഫോൺസ് കണ്ണന്താനം എന്ന മോഡിയുടെ മന്ത്രിയായ സംഘിയെ സ്വീകരിക്കുമ്പോൾ പിണറായി വിജയന്റെ മുഖത്ത് തിളങ്ങിയ ആ സ്നേഹത്തെയും ഊഷ്മളതെയും ഒന്ന് നന്നായി ശ്രദ്ധിക്കൂ. മാധ്യമക്കാർ ഇല്ലെന്ന് പറഞ്ഞു സ്ഥാപിക്കാൻ ശ്രമിച്ച പിണറായിയുടെ നിറഞ്ഞ പുഞ്ചിരി നിങ്ങളും കണ്ടില്ലേ?

പിണറായി തന്നെ രാഷ്ട്രീയത്തിൽ കൈ പിടിച്ചു കൊണ്ട് വന്നത് എന്ന് സ്വയം അവകാശപ്പെടുന്ന അൽഫോൺസ്, പാർട്ടിയെ തള്ളിപ്പറഞ്ഞു മോഡിക്കൊപ്പം പോയപ്പോഴും കുലംകുത്തിയെന്ന് ചാപ്പ കുത്തി ആക്രമിക്കാനല്ല മറിച്ച് സൌഹൃദം ഊട്ടി ഉറപ്പിക്കാനാണ് രണ്ട് പേരും ശ്രമിക്കുന്നത് എന്നത് താഴെക്കിടയിലെ പ്രവർത്തകർ കാണാതിരുന്നുകൂടാ.

പിണറായിയെയും കണ്ണന്താനത്തെയും മാതൃകയാക്കി, തങ്ങളുടെയും കുടുംബത്തിന്റെയും സർവ്വോപരി കേരളത്തിന്റെയും നന്മയ്ക്കായി, പരസ്പര വൈരം വെടിഞ്ഞ്, അർത്ഥമില്ലാത്ത കൊലപാതക മത്സരം വെടിഞ്ഞ്, ഈ നാട്ടിൽ ശാന്തിയും സമാധാനവും പുലർത്താൻ നിങ്ങള്‍ക്ക് കഴിയട്ടെ എന്ന് ആശംസിക്കുന്നു......

കുമ്മനവും പിണറായിയും ഒരുമിച്ച ചില മെട്രോ ചിന്തകൾ

കേരളത്തിന്റെ സമീപകാല ചരിത്രത്തിൽ വികസനത്തിന്റെ ഒരു നാഴികക്കല്ല്... കൊച്ചി മെട്രോ യാഥാർഥ്യമായി ദിനം....  കേരളീയർക്കാകെ അഭിമാനിക്കാവുന്ന ഒരു ദിനം തന്നെ! 

പ്രോട്ടോകോൾ, സെക്യൂരിറ്റി തുടങ്ങിയ കടുകട്ടി പദപ്രയോഗങ്ങൾക്കിടയിൽ തുടങ്ങിയ ഒരു യാത്ര. ആദ്യത്തെ ചിത്രത്തിൽ നോക്കിയപ്പോൾ പരിചയമുള്ള മുഖങ്ങൾ- ഇന്ത്യയുടെ പ്രധാനമന്ത്രി, കേന്ദ്ര നഗരവികസന വകുപ്പ് മന്ത്രി, കേരളത്തിന്റെ ഗവർണ്ണർ, മുഖ്യമന്ത്രി. സ്ഥലത്തെ ജനപ്രതിനിധികൾ മുതൽ മെട്രോ യാഥാർഥ്യമാക്കാൻ വേണ്ടി പ്രയത്നിച്ചവർ വരെ ആരെയും ആ ആദ്യ യാത്രയിൽ കണ്ടില്ല. പ്രോട്ടോകോൾ അല്ലെ എന്ന് സമാധാനിക്കാം എന്ന് കരുതിയപ്പോഴാണ് അതെ വരിയിൽ മറ്റൊരു മുഖം കണ്ടത്. അടുത്ത കാലത്തു വരെ ഒരു പ്രത്യേക മത വിഭാഗത്തിന്റെ സമുദായ സംഘടനയുടെ നേതാവും, ഈയിടെ മാത്രം ഭാരതീയ ജനതാ പാർട്ടി ഇറക്കുമതി ചെയ്ത് കേരളത്തിൽ പാർട്ടിയുടെ പ്രസിഡന്റ് ആക്കിയ ആളുമായ കുമ്മനം രാജശേഖരൻ! 

വലിഞ്ഞു കയറി  വന്നവൻ, കള്ളവണ്ടി കേറിയവൻ, കണ്ണേറ് തട്ടാതിരിക്കാൻ ഒപ്പം കൂട്ടിയവൻ എന്നൊക്കെ ട്രോളുകൾ സോഷ്യൽ മീഡിയയിൽ കുമ്മനത്തെ വിശേഷിപ്പിച്ചത് സ്വാഭാവികം മാത്രം! മേൽ പറഞ്ഞ മഹദ് വ്യക്തികളുടെ (അവർ ഇരിക്കുന്ന സ്ഥാനം കൊണ്ടുള്ള മഹത്വം ആണ് ഉദ്ദേശിച്ചത്) കൂട്ടത്തിൽ മെട്രോയുടെ ആദ്യ യാത്രയിൽ കയറി ഇരിക്കാനുള്ള ഒരു യോഗ്യതയും പ്രോട്ടോകോൾ പ്രകാരമോ, നാട്ടു നടപ്പു പ്രകാരമോ കുമ്മനത്തിൽ കാണാൻ പ്രയാസമാണ്. 

പക്ഷേ ഒന്നോർത്താൽ ഇതാദ്യമല്ലല്ലോ! മെട്രോയിൽ ഇതിനു മുൻപും ഒരു യാത്ര നടന്നിരുന്നു. മുഖ്യമന്ത്രി പിണറായി വിജയൻ ആഘോഷ പൂർവം നടത്തിയ ഒരു യാത്ര. അന്നത്തെ ചിത്രങ്ങളിൽ മറ്റൊരു മുഖം ഓർക്കുന്നു. മാർക്സിസ്റ്റ് പാർട്ടിയുടെ ഒരു ജില്ലാ നേതാവായ P രാജീവ് മുഖ്യമന്ത്രിയെ അനുഗമിക്കുന്ന കാഴ്ച! പിണറായിക്കു രാജീവിനെ ഒപ്പം കൂട്ടാമെങ്കിൽ മോദിക്ക് കുമ്മനത്തെയും കൂട്ടാം. പിണറായിക്കും മോദിക്കും സ്ഥലത്തെ ജനപ്രതിനിധികളെയും മറ്റും ഒപ്പം   കൂട്ടണം എന്ന സാമാന്യ ബോധം ഉണ്ടാവണം എന്ന് ശഠിക്കുന്നതും തെറ്റ് തന്നെ. ഈ മെട്രോ ഒരു യാഥാർഥ്യമാക്കിയതിന്റെ പൊളിറ്റിക്കൽ ക്രെഡിറ്റ് എന്ത് കൊണ്ടും അവകാശപ്പെടാവുന്ന ഉമ്മൻ ചാണ്ടിയെ കൂടെ കൂട്ടണം എന്ന് ചിലർ അഭിപ്രായപ്പെട്ടതും ബാലിശം എന്ന് തന്നെ പറയാം. കോൺഗ്രസ് പാർട്ടിയെ മുഖ്യ ശത്രുക്കളായി കാണുന്ന രണ്ടു പാർട്ടികൾ ചേർന്ന് നടത്തുന്ന ഈ ചടങ്ങിൽ കുമ്മനത്തെ കയറ്റിയാലും ചാണ്ടിയെ കയറ്റുന്നത് അല്പം കടന്ന കൈ തന്നെ ആയിപ്പോകും.

എന്റെ ചിന്ത മറ്റൊന്നാണ്. കേരളത്തിന് ഇതിലും നല്ല ഒരവസരം കിട്ടാൻ അടുത്ത കാലത്തു പ്രയാസമുള്ള ഒരു കാര്യമാണ് എന്റെ മനസ്സിൽ. ഒരു ഭാഗത്തു കുമ്മനവും മോഡിയും. മറുഭാഗത്തു പിണറായി വിജയൻ. നടുക്ക് ഇന്ത്യയുടെ മുൻ ചീഫ് ജസ്റ്റിസ് ആയ ഇന്നത്തെ ഗവർണ്ണർ! മധ്യസ്ഥൻ ആവാൻ ഇത്രയും യോഗ്യനായ മറ്റാരെ കിട്ടും? 

ഈ അവസരം മുതലെടുത്തു, കേരളത്തിൽ അങ്ങോളമിങ്ങോളവും പ്രത്യേകിച്ച് കണ്ണൂരിലും നടക്കുന്ന BJP-CPM അക്രമങ്ങളും പരസ്പരമുള്ള കൊലപാതകങ്ങളും നിർത്തിവെക്കാൻ ഇവർക്കൊന്നു ശ്രമിക്കാമായിരുന്നില്ലേ? കുറച്ചു പാവപ്പെട്ട മലയാളികളുടെ ജീവനെങ്കിലും രക്ഷപ്പെടുമല്ലോ! കൂടാതെ ശാന്തിയും സമാധാനവും ഇല്ലാതെ, ഹർത്താലുകൾ  കുറയാതെ, മോഡിയും പിണറായിയും പറഞ്ഞ development ഉം വികസനവും ഒക്കെ എങ്ങിനെ വരും?  

UPA തുടങ്ങിവെച്ച, 80-90 ശതമാനവും UDF നിർമിച്ച, ഒരു മെട്രോ ഉദ്‌ഘാടനം ചെയ്യാൻ വേണ്ടി ഒന്നിക്കാവുന്ന കുമ്മനത്തിനും പിണറായിക്കും കേരളത്തിന് വേണ്ടി ഇത്രയെങ്കിലും ചെയ്യാമായിരുന്നില്ലേ എന്ന ഒരു നിരാശ മാത്രം മനസ്സിൽ ബാക്കി നിൽക്കുന്നു! 

ഇനി ഇതൊരു വിവാദമാക്കേണ്ട. പോയ ബുദ്ധി ആന പിടിച്ചാലും വരില്ല എന്നല്ലേ! കൂടാതെ വിവാദക്കാരെ നിരാശപ്പെടുത്താൻ മുഖ്യമന്ത്രി ഏതറ്റം വരെയും പോവും.....അത് കുമ്മനത്തിനു ഒപ്പം ആണെങ്കിലും!

ഒരു കേരളം, രണ്ടു മരണങ്ങൾ!

ഇന്നത്തെ പത്രം, രണ്ടു മരണങ്ങൾ  

പെരുമ്പാവൂരിലെ ജിഷ, നരിപ്പറ്റ കുയ്തെരിമ്മൽ ലിനീഷ്

ജിഷ .... 

മറ്റൊരു സൗമ്യ, മറ്റൊരു നിർഭയ

പുരുഷ മേധാവിത്വത്തിന്റെ, കാമവെറിയുടെ, 

ജാതി വ്യവസ്ഥയുടെ, മറ്റെന്തിന്റെയൊക്കെയോ  

എണ്ണിയാലൊടുങ്ങാത്ത പെണ്ണിരകളിൽ മറ്റൊരുവൾ...

സമൂഹം മുഴുവൻ ഉണർന്നെണീറ്റു കഴിഞ്ഞു

പോസ്റ്റ്‌മോർട്ടം തകൃതിയായി നടക്കുന്നു

ആരൊക്കെ ഉത്തരവാദികൾ? 

കണ്ടെത്തണം, ശിക്ഷിക്കണം... എന്നാലായോ?

അടച്ചുറപ്പില്ലാത്ത വീട്ടിൽ,  ഒറ്റമുറിയിൽ ഇങ്ങിനെ 

ജീവിക്കാൻ, കൊല്ലപ്പെടാൻ, ജിഷയെ എങ്ങിനെ നാം അനുവദിച്ചു?

മരിക്കും വരെ, അല്ല വാർത്തയാകും വരെ 

എവിടെ ആയിരുന്നു സാംസ്കാരിക കേരളം? ഭരണകൂടം? 

ആവശ്യക്കാരിൽ ആവശ്യക്കാരായ ജിഷയുടെ കുടുംബത്തെ 

എന്തെ നാം കണ്ടെത്തിയില്ല?

ഉദ്ധ്യോഗസ്ഥർ, രാഷ്ട്രീയക്കാർ, സംഘടനകൾ, 

എണ്ണിയാലൊടുങ്ങാത്ത സാമൂഹ്യ പ്രവർത്തകർ

ആരും കണ്ടില്ലേ ഈ ദൈന്യം? ഒരു പരിഹാരം?

മരണത്തിൽ ധാർമികരോഷം എത്രയോ എളുപ്പം;

ജീവനുള്ള പരിഹാരം ആണ് ഏറെ കഠിനം!

അതുവരെ, പൂർണതയില്ലാത്ത ഈ ലോകത്ത് 

ജിഷമാർ ഇനിയും ആക്രമിക്കപ്പെടും, തടയാനാവില്ല

ഇരകൾക്ക് നീതിയെങ്കിലും ഉറപ്പാക്കി 

സമൂഹത്തിനു സുഖനിദ്ര പൂകാം!

ഒപ്പം, ഓണത്തിനിടയിലെ പൂട്ടുകച്ചവടം പോലെ

കുറച്ചു വോട്ടും, കുറച്ചു TRP യും തരപ്പെടുമോ

എന്നും കൂടി നോക്കാം.. 

ലിനീഷ്...

വീടില്ലാഞ്ഞിട്ടല്ല, പെണ്ണായിട്ടല്ല, ദളിതനുമല്ല

എന്നിട്ടും കൊല്ലപ്പെട്ടു, മുപ്പത്തിനാലാം വയസ്സിൽ!

സഘാക്കൾക്കൊപ്പം ബോംബുണ്ടാക്കുകയായിരുന്നു

പൊട്ടിയത് അല്പം നേരത്തെ ആയിപ്പോയി; 

ചിതറിയത് സ്വന്തം കൈകളും!

വോട്ടിനിടയിൽ, ബോംബിനെന്തു കാര്യം? 

എന്തിനെന്നോ, ആർക്കു വേണ്ടിയെന്നോ അറിയേണ്ടേ? 

ഉത്തരവാദികളെ കണ്ടെത്തണ്ടേ?  ശിക്ഷിക്കേണ്ടേ?

അല്ല, മറ്റൊരു രക്തസാക്ഷി സ്തൂപമൊരുക്കി എല്ലാം മറക്കാനോ? 

പോസ്റ്റ്‌മോർട്ടം ഇല്ല, ധാർമികരോഷമില്ല, ഉള്ളത്

കാതടപ്പിക്കുന്ന നിശബ്ധത മാത്രം!

ഇവിടെയും വേണ്ടേ ഒരു ജീവനുള്ള പരിഹാരം?

ഒടുങ്ങേണ്ടേ ഈ അക്രമ, ബോംബു രാഷ്ട്രീയം?

കാമവെറി പൂണ്ട നരാധമന്മാർ എപ്പോഴും ഉണ്ടാവും

അവരിൽ നിന്നും ജിഷയെ ജീവനോടെ രക്ഷിക്കാൻ 

അടച്ചുറപ്പുള്ള മേൽക്കൂരയെങ്കിലും നല്കാം 

അധികാര ഭ്രാന്ത് മൂത്ത നേതാക്കളും ഉണ്ടാവും

ലിനീഷുമാരെ, ജനാധിപത്യത്തെ, നമ്മുടെ നാടിനെത്തന്നെ

ആ നേതാക്കളിൽ നിന്നും കൂടി രക്ഷിക്കണം!

ഓരോ ജീവനും ജീവിച്ചു തീരട്ടെ! 


P.S:  പത്രവാർത്തകളിൽ നിന്നും അറിയാൻ കഴിഞ്ഞത്, മുൻപ് തന്നെ ജിഷയുടെ കുടുംബത്തിനു വീട് വെക്കാനായി കേരള സർക്കാർ ധനസഹായം നല്കിയിട്ടുണ്ട് എന്നാണ്. 3.75 ലക്ഷം രൂപ 5 സെന്റ്‌ സ്ഥലം വാങ്ങാനും 3 ലക്ഷം രൂപ അതിൽ ഒരു വീട് വെക്കാനും. അങ്ങിനെ വാങ്ങിയ സ്ഥലത്ത് വീട് നിർമാണം പുരോഗമിച്ചു കൊണ്ടിരിക്കുന്നു! 

നാദാപുരത്തെ ബോംബുകൾ

നാദാപുരം പ്രദേശത്തെ മത്സരിച്ചുള്ള ബോംബ്‌ നിർമാണം, പോലിസിനെ, അല്ലെങ്കിൽ സമൂഹമന:സാക്ഷിയെ എങ്കിലും ഉണർത്തേണ്ട സമയം അതിക്രമിച്ചിരിക്കുന്നു

തിരഞ്ഞെടുപ്പ് അടുത്തിരിക്കെ മറ്റൊരു കൂട്ടം ചെറുപ്പക്കാർക്ക് കൂടി ബോംബ്‌ നിർമാണത്തിനിടയിൽ നടന്ന സ്പോടനത്തിൽ സാരമായ പരിക്കേറ്റു!

ഈ പ്രാവശ്യത്തെ (കുറ്റവാളികൾ കൂടിയായ) ഇരകൾ അധികാരത്തിൽ എത്തിയാൽ എല്ലാം ശരിയാക്കി തരാം എന്ന് പറഞ്ഞു വോട്ട് പിടിക്കുന്നവരുടെ ആളുകൾ ആണുപോലും! എങ്കിലും നാദാപുരത്തെ ബോംബുകളുടെ സമീപകാല ചരിത്രം നോക്കിയാൽ ഈ കുറ്റം ഏതെങ്കിലും ഒരു പാർട്ടിയുടെ മാത്രമല്ല എന്ന് മനസ്സിലാവും. മിക്ക പാർട്ടികളും തങ്ങളാൽ ആവുന്നത് പോലെ നോക്കുന്നു!

നാദാപുരത്തെ ബോംബുകൾ ഏതായാലും ജനങ്ങളെ സേവിക്കാൻ ഉള്ളതല്ല.. പിന്നെ, ആർക്കു വേണ്ടി? എന്തിനു വേണ്ടി? ആരാണ് ഇതിനു പിന്നിൽ കളിക്കുന്നത്?

നേതാക്കന്മാരുടെ കാര്യം പോട്ടെ, എങ്ങിനെ ഇത്രയും ചെറുപ്പക്കാർ ബോംബു നിർമാണവും കൊലപാതക രാഷ്ട്രീയവും പോലുള്ള ഹീനമായ പ്രവൃത്തികളിൽ എത്തിപ്പെടുന്നു? സാമൂഹ്യബോധം ഇല്ലെങ്കിലും സ്വയരക്ഷാ ബോധമെങ്കിലും വേണ്ടേ, വിശേഷബുദ്ധി ഉണ്ടെന്നു നാം അവകാശപ്പെടുന്ന ഈ മനുഷ്യ മൃഗങ്ങൾക്ക്?