പിണറായി- കണ്ണന്താനം മാതൃക

കേരളത്തിലെ, വിശിഷ്യാ കണ്ണൂരിലെ സഖാക്കളോടും സംഘാക്കളോടും ഒരു അഭ്യര്‍ത്ഥന..

നിങ്ങൾ പരസ്പരം വെട്ടിക്കീറാൻ ഇറങ്ങുന്നതിനു മുമ്പ് ഒരു നിമിഷം അങ്ങ് ഡൽഹിയിലെ കേരള ഹൗസിൽ വച്ച് താൻ നൽകിയ സൽകാരം കൈക്കൊള്ളാൻ വന്ന അൽഫോൺസ് കണ്ണന്താനം എന്ന മോഡിയുടെ മന്ത്രിയായ സംഘിയെ സ്വീകരിക്കുമ്പോൾ പിണറായി വിജയന്റെ മുഖത്ത് തിളങ്ങിയ ആ സ്നേഹത്തെയും ഊഷ്മളതെയും ഒന്ന് നന്നായി ശ്രദ്ധിക്കൂ. മാധ്യമക്കാർ ഇല്ലെന്ന് പറഞ്ഞു സ്ഥാപിക്കാൻ ശ്രമിച്ച പിണറായിയുടെ നിറഞ്ഞ പുഞ്ചിരി നിങ്ങളും കണ്ടില്ലേ?

പിണറായി തന്നെ രാഷ്ട്രീയത്തിൽ കൈ പിടിച്ചു കൊണ്ട് വന്നത് എന്ന് സ്വയം അവകാശപ്പെടുന്ന അൽഫോൺസ്, പാർട്ടിയെ തള്ളിപ്പറഞ്ഞു മോഡിക്കൊപ്പം പോയപ്പോഴും കുലംകുത്തിയെന്ന് ചാപ്പ കുത്തി ആക്രമിക്കാനല്ല മറിച്ച് സൌഹൃദം ഊട്ടി ഉറപ്പിക്കാനാണ് രണ്ട് പേരും ശ്രമിക്കുന്നത് എന്നത് താഴെക്കിടയിലെ പ്രവർത്തകർ കാണാതിരുന്നുകൂടാ.

പിണറായിയെയും കണ്ണന്താനത്തെയും മാതൃകയാക്കി, തങ്ങളുടെയും കുടുംബത്തിന്റെയും സർവ്വോപരി കേരളത്തിന്റെയും നന്മയ്ക്കായി, പരസ്പര വൈരം വെടിഞ്ഞ്, അർത്ഥമില്ലാത്ത കൊലപാതക മത്സരം വെടിഞ്ഞ്, ഈ നാട്ടിൽ ശാന്തിയും സമാധാനവും പുലർത്താൻ നിങ്ങള്‍ക്ക് കഴിയട്ടെ എന്ന് ആശംസിക്കുന്നു......

കുമ്മനവും പിണറായിയും ഒരുമിച്ച ചില മെട്രോ ചിന്തകൾ

കേരളത്തിന്റെ സമീപകാല ചരിത്രത്തിൽ വികസനത്തിന്റെ ഒരു നാഴികക്കല്ല്... കൊച്ചി മെട്രോ യാഥാർഥ്യമായി ദിനം....  കേരളീയർക്കാകെ അഭിമാനിക്കാവുന്ന ഒരു ദിനം തന്നെ! 

പ്രോട്ടോകോൾ, സെക്യൂരിറ്റി തുടങ്ങിയ കടുകട്ടി പദപ്രയോഗങ്ങൾക്കിടയിൽ തുടങ്ങിയ ഒരു യാത്ര. ആദ്യത്തെ ചിത്രത്തിൽ നോക്കിയപ്പോൾ പരിചയമുള്ള മുഖങ്ങൾ- ഇന്ത്യയുടെ പ്രധാനമന്ത്രി, കേന്ദ്ര നഗരവികസന വകുപ്പ് മന്ത്രി, കേരളത്തിന്റെ ഗവർണ്ണർ, മുഖ്യമന്ത്രി. സ്ഥലത്തെ ജനപ്രതിനിധികൾ മുതൽ മെട്രോ യാഥാർഥ്യമാക്കാൻ വേണ്ടി പ്രയത്നിച്ചവർ വരെ ആരെയും ആ ആദ്യ യാത്രയിൽ കണ്ടില്ല. പ്രോട്ടോകോൾ അല്ലെ എന്ന് സമാധാനിക്കാം എന്ന് കരുതിയപ്പോഴാണ് അതെ വരിയിൽ മറ്റൊരു മുഖം കണ്ടത്. അടുത്ത കാലത്തു വരെ ഒരു പ്രത്യേക മത വിഭാഗത്തിന്റെ സമുദായ സംഘടനയുടെ നേതാവും, ഈയിടെ മാത്രം ഭാരതീയ ജനതാ പാർട്ടി ഇറക്കുമതി ചെയ്ത് കേരളത്തിൽ പാർട്ടിയുടെ പ്രസിഡന്റ് ആക്കിയ ആളുമായ കുമ്മനം രാജശേഖരൻ! 

വലിഞ്ഞു കയറി  വന്നവൻ, കള്ളവണ്ടി കേറിയവൻ, കണ്ണേറ് തട്ടാതിരിക്കാൻ ഒപ്പം കൂട്ടിയവൻ എന്നൊക്കെ ട്രോളുകൾ സോഷ്യൽ മീഡിയയിൽ കുമ്മനത്തെ വിശേഷിപ്പിച്ചത് സ്വാഭാവികം മാത്രം! മേൽ പറഞ്ഞ മഹദ് വ്യക്തികളുടെ (അവർ ഇരിക്കുന്ന സ്ഥാനം കൊണ്ടുള്ള മഹത്വം ആണ് ഉദ്ദേശിച്ചത്) കൂട്ടത്തിൽ മെട്രോയുടെ ആദ്യ യാത്രയിൽ കയറി ഇരിക്കാനുള്ള ഒരു യോഗ്യതയും പ്രോട്ടോകോൾ പ്രകാരമോ, നാട്ടു നടപ്പു പ്രകാരമോ കുമ്മനത്തിൽ കാണാൻ പ്രയാസമാണ്. 

പക്ഷേ ഒന്നോർത്താൽ ഇതാദ്യമല്ലല്ലോ! മെട്രോയിൽ ഇതിനു മുൻപും ഒരു യാത്ര നടന്നിരുന്നു. മുഖ്യമന്ത്രി പിണറായി വിജയൻ ആഘോഷ പൂർവം നടത്തിയ ഒരു യാത്ര. അന്നത്തെ ചിത്രങ്ങളിൽ മറ്റൊരു മുഖം ഓർക്കുന്നു. മാർക്സിസ്റ്റ് പാർട്ടിയുടെ ഒരു ജില്ലാ നേതാവായ P രാജീവ് മുഖ്യമന്ത്രിയെ അനുഗമിക്കുന്ന കാഴ്ച! പിണറായിക്കു രാജീവിനെ ഒപ്പം കൂട്ടാമെങ്കിൽ മോദിക്ക് കുമ്മനത്തെയും കൂട്ടാം. പിണറായിക്കും മോദിക്കും സ്ഥലത്തെ ജനപ്രതിനിധികളെയും മറ്റും ഒപ്പം   കൂട്ടണം എന്ന സാമാന്യ ബോധം ഉണ്ടാവണം എന്ന് ശഠിക്കുന്നതും തെറ്റ് തന്നെ. ഈ മെട്രോ ഒരു യാഥാർഥ്യമാക്കിയതിന്റെ പൊളിറ്റിക്കൽ ക്രെഡിറ്റ് എന്ത് കൊണ്ടും അവകാശപ്പെടാവുന്ന ഉമ്മൻ ചാണ്ടിയെ കൂടെ കൂട്ടണം എന്ന് ചിലർ അഭിപ്രായപ്പെട്ടതും ബാലിശം എന്ന് തന്നെ പറയാം. കോൺഗ്രസ് പാർട്ടിയെ മുഖ്യ ശത്രുക്കളായി കാണുന്ന രണ്ടു പാർട്ടികൾ ചേർന്ന് നടത്തുന്ന ഈ ചടങ്ങിൽ കുമ്മനത്തെ കയറ്റിയാലും ചാണ്ടിയെ കയറ്റുന്നത് അല്പം കടന്ന കൈ തന്നെ ആയിപ്പോകും.

എന്റെ ചിന്ത മറ്റൊന്നാണ്. കേരളത്തിന് ഇതിലും നല്ല ഒരവസരം കിട്ടാൻ അടുത്ത കാലത്തു പ്രയാസമുള്ള ഒരു കാര്യമാണ് എന്റെ മനസ്സിൽ. ഒരു ഭാഗത്തു കുമ്മനവും മോഡിയും. മറുഭാഗത്തു പിണറായി വിജയൻ. നടുക്ക് ഇന്ത്യയുടെ മുൻ ചീഫ് ജസ്റ്റിസ് ആയ ഇന്നത്തെ ഗവർണ്ണർ! മധ്യസ്ഥൻ ആവാൻ ഇത്രയും യോഗ്യനായ മറ്റാരെ കിട്ടും? 

ഈ അവസരം മുതലെടുത്തു, കേരളത്തിൽ അങ്ങോളമിങ്ങോളവും പ്രത്യേകിച്ച് കണ്ണൂരിലും നടക്കുന്ന BJP-CPM അക്രമങ്ങളും പരസ്പരമുള്ള കൊലപാതകങ്ങളും നിർത്തിവെക്കാൻ ഇവർക്കൊന്നു ശ്രമിക്കാമായിരുന്നില്ലേ? കുറച്ചു പാവപ്പെട്ട മലയാളികളുടെ ജീവനെങ്കിലും രക്ഷപ്പെടുമല്ലോ! കൂടാതെ ശാന്തിയും സമാധാനവും ഇല്ലാതെ, ഹർത്താലുകൾ  കുറയാതെ, മോഡിയും പിണറായിയും പറഞ്ഞ development ഉം വികസനവും ഒക്കെ എങ്ങിനെ വരും?  

UPA തുടങ്ങിവെച്ച, 80-90 ശതമാനവും UDF നിർമിച്ച, ഒരു മെട്രോ ഉദ്‌ഘാടനം ചെയ്യാൻ വേണ്ടി ഒന്നിക്കാവുന്ന കുമ്മനത്തിനും പിണറായിക്കും കേരളത്തിന് വേണ്ടി ഇത്രയെങ്കിലും ചെയ്യാമായിരുന്നില്ലേ എന്ന ഒരു നിരാശ മാത്രം മനസ്സിൽ ബാക്കി നിൽക്കുന്നു! 

ഇനി ഇതൊരു വിവാദമാക്കേണ്ട. പോയ ബുദ്ധി ആന പിടിച്ചാലും വരില്ല എന്നല്ലേ! കൂടാതെ വിവാദക്കാരെ നിരാശപ്പെടുത്താൻ മുഖ്യമന്ത്രി ഏതറ്റം വരെയും പോവും.....അത് കുമ്മനത്തിനു ഒപ്പം ആണെങ്കിലും!

വരമ്പത്തെ കൂലി..

ഇന്ത്യൻ നിയമത്തിൽ ആത്‌മരക്ഷക്കായി നടത്തുന്ന പ്രവൃത്തികൾക്ക് പ്രത്യേക സംരക്ഷണം നൽകിയിട്ടുണ്ട്. ചില സഖാക്കൾ കോടിയേരി ബാലകൃഷ്ണന്റെ പയ്യന്നൂർ പ്രസംഗത്തെ ന്യായീകരിക്കാൻ ഈ സംരക്ഷണത്തിന്റെ കാര്യം പറയുന്നത് കേൾക്കാൻ ഇടയായി. എന്നാൽ കാര്യങ്ങൾ അങ്ങിനെ ആണോ? ഒന്നു പരിശോധിക്കാം!

ഇന്ത്യൻ ക്രിമിനൽ നിയമം സംരക്ഷിക്കുന്നത് തന്റെയോ തന്റെ അടുത്തവരുടെയോ ജീവന് ഭീഷണി ആയേക്കാവുന്ന അക്രമങ്ങളെ ചെറുക്കുന്നതിനുള്ള അവകാശത്തെ ആണ്. എന്നാൽ ഈ സംരക്ഷണം നിയന്ത്രണങ്ങൾ ഇല്ലാത്ത ഒരു അവകാശം അല്ല. ധാരാളം നിയന്ത്രണങ്ങൾക്ക് വിധേയമാണ് ആത്മരക്ഷ അഥവാ self-defense.  ആത്മരക്ഷ പ്രയോഗത്തിൽ വരുന്നത് ഒരാൾ വിചാരിച്ചിരിക്കാതെ ആക്രമിക്കപ്പെടുമ്പോൾ അയാളോ കൂടെ ഉള്ള ആളോ അത് തടയുന്നതിൽ മാത്രമാണ്. അങ്ങിനെ തടയുന്നതിനിടയ്ക്കു വരുന്ന കാര്യങ്ങൾ മാത്രമേ നിയമത്താൽ സംരക്ഷിക്കപ്പെടുന്നുള്ളൂ എന്ന് സാരം. 

കോടിയേരി ആഹ്വാനം ചെയ്യുന്നത് പോലെ ഉള്ള മുൻകൂട്ടി തെയ്യാർ ചെയ്തുള്ളതും സംഘം ചേർന്നുള്ളതും ആയ തിരിച്ചടികൾ അതിന്റെ കീഴിൽ വരില്ല.  ഒരു ആക്രമണം ഉണ്ടാവും എന്ന സൂചന ഉണ്ടെങ്കിൽ ഒരാൾ ചെയ്യേണ്ടത് പോലീസ് സംരക്ഷണം നേടുക എന്നതാണ്. അല്ലാതെ, സ്വന്തമായി ഗുണ്ടാ സംഘങ്ങൾ രൂപികരിച്ചു ആക്രമത്തെ ചെറുക്കാൻ തുടങ്ങിയാൽ അതിനു നിയമത്തിന്റെ സംരക്ഷണം കിട്ടില്ല. പ്രത്യേകിച്ചും, വയലിലെ ജോലിക്കു വരമ്പത്തു കൂലി കൊടുക്കാൻ നോക്കുമ്പോൾ! വരമ്പത്തെ കൂലി ആക്രമണം തടയാനല്ല മറിച്ചു പ്രതികാരം ചെയ്യാനും കണക്കു തീർക്കാനും വേണ്ടി ഉള്ളതാണ്. റിപ്പോർട്ടുകൾ അനുസരിച്ചു കോടിയേരി ആഹ്വാനം ചെയ്യുന്നത് ചെറുപ്പക്കാരെ പരിശീലനം കൊടുത്തു തയ്യാറാക്കി നിർത്താനാണ്. ആക്രമിച്ചാൽ തിരിച്ചടിക്കാൻ ആയിട്ടാണ് ഈ പരിശീലനം. 

വയലിലെ കുറ്റകൃത്യങ്ങൾക്ക് വരമ്പത് കൂലി കൊടുക്കാൻ ആണ് നമ്മുടെ സമൂഹം പോലീസ് സേനയെ ചെല്ലും ചെലവും കൊടുത്തു പോറ്റുന്നത്. പോലീസ് സേനക്കൊപ്പം ആഭ്യന്തര മന്ത്രിയുടെ ചെലവ് വഹിക്കുന്നതും സമൂഹം തന്നെ. സംസ്ഥാനം ഭരിക്കുന്ന പാർട്ടിയുടെ സെക്രട്ടറിക്കു പോലീസിന്റെ അങ്ങിനെ ചെയ്യാനുള്ള മനസ്സിലോ കഴിവിലോ സംശയം ഉണ്ടെങ്കിൽ ചെയ്യേണ്ടത് ആഭ്യന്തര മന്ത്രിയെ മാറ്റുക എന്നതാണ്. അല്ലാതെ കുട്ടി സഖാക്കളെ ആയുധ പരിശീലനം കൊടുത്തു ആക്രമണത്തിന് പകരം വീട്ടാൻ തയ്യാറാക്കുകയല്ല. 

ഭരിക്കുന്ന പാർട്ടിയുടെ നേതൃത്വം തന്നെ പോലീസിന്റെ കഴിവിൽ സംശയം പ്രകടിപ്പിക്കുമ്പോൾ, സാധാരണ ജനങ്ങൾ എന്ത് ചെയ്യണം? അക്രമം വരുമ്പോൾ നിയമം സ്വയം കയ്യിൽ എടുക്കുകതന്നെ ആണോ വേണ്ടത്?  അല്ലെങ്കിൽ തന്നെ, ആക്രമണം വരുന്നത് വരെ എന്തിനു കാത്തിരിക്കണം? വരാൻ സാധ്യത ഉണ്ടെന്നു സ്വയം ബോധ്യം ഉണ്ടെങ്കിൽ പ്രത്യാക്രമണം നടത്തിക്കൂടേ? Offense is the best form of defense എന്നല്ലേ പ്രമാണം? 

ഒസാമ ബിൻ ലാദനും IS ഉം ഒക്കെ ചെയ്യുന്നതും ഇതല്ലേ? അവർക്കു അക്രമകാരികൾ എന്നു തോന്നുന്നവരെ അവർ തിരിച്ചു ആക്രമിക്കുന്നു! ഇറാഖിലും അഫ്ഘാനിസ്ഥാനിലും ഒക്കെ പാശ്ചാത്യരാഷ്ടങ്ങൾ ചെയ്തു എന്ന് അവർ കരുതുന്ന ആക്രമണങ്ങൾക്കു അവരുടെ തിരിച്ചടി! കഷ്ടം, അതിനാണ് ആ പാവങ്ങളെ നാം ഭീകരർ എന്നൊക്കെ വിളിക്കുന്നത്!

സംഘികൾ അവകാശപ്പെടുന്നത് ആക്രമണങ്ങൾ മുഴുവൻ തുടങ്ങുന്നത് CPM കാർ ആണെന്നാണ്. അവരും പോലീസിനെ വിട്ടു, സ്വയം തിരിച്ചടിക്കുക എന്ന നയം സ്വീകരിച്ചാൽ (ഇപ്പോൾ പ്രവൃത്തിയിൽ അങ്ങിനെ അല്ല എന്നല്ല സാരം) പിന്നെ ഇവിടെ എന്തിനു പോലീസ്? എന്തിനു നിയമ വാഴ്ച? TP വധക്കേസിൽ CBI അന്വേഷണം ആവശ്യപ്പെട്ടു നടക്കുന്ന RMP ക്കാരും ഈ നയം സ്വീകരിച്ചാൽ? 

കയ്യൂക്കുള്ളവൻ കാര്യക്കാരൻ എന്ന സമത്വ സുന്ദര കാടൻ നിയമം നമുക്ക് തിരിച്ചു പിടിക്കാം! കൂലി വരമ്പത്തു വെച്ച് തന്നെ തീർക്കാം! പിണറായി സഖാവ് ഇതൊന്നു നിയമം ആക്കി പാസ്സാക്കി തന്നെങ്കിൽ എല്ലാറ്റിനും ഒരു കൃത്യത വന്നേനെ!

P. S. കണ്ണിനു പകരം കണ്ണ് എന്ന നീതി നടപ്പാക്കിയാൽ ഈ ലോകം മുഴുവൻ അന്ധരെക്കൊണ്ടു നിറയും എന്ന് പറഞ്ഞ ആ മഹാത്മാവിനു മുന്നിൽ ഈ പോസ്റ്റ് സമർപ്പിക്കുന്നു!

കേരളാ മോഡി?

ഇന്ന് കേരളത്തിന്‌ ഒരു പുതിയ സർക്കാർ ലഭിച്ച ദിവസം.. 

ആദ്യമേ നല്ലത് ആശംസിക്കട്ടെ- സർക്കാരിനും കേരളത്തിനും!

നല്ലത് മാത്രം പറയേണ്ട, ചിന്തിക്കേണ്ട ദിവസം ആണെങ്കിലും ചില അശുഭ ചിന്തകൾ മനസ്സിൽ ഉടലെടുക്കുന്നു!

ബോംബെറിഞ്ഞു ആക്രമിക്കപ്പെട്ട ഒരു ബന്ധു വീട്ടിൽ രാവിലെ തന്നെ പോയതിനാലാവാം 

അങ്ങ് ഡൽഹിയിൽ ഇറങ്ങിയ, പിണറായി വിജയൻ സർക്കാർ വരുന്നു എന്ന ഫുൾ പേജ് പരസ്യങ്ങളെക്കുറിച്ചുള്ള വാർത്ത കണ്ടതിനാലും ആവാം

അല്ലെങ്കിൽ, രാഷ്ട്രീയ എതിരാളികൾ നേടിയ വിജയത്തിൽ തോന്നുന്ന മനുഷ്യ സഹജമായ അസൂയ മൂലവും ആയേക്കാം...

എന്തായാലും മനസ്സിൽ തോന്നുന്നത് ഇവിടെ കുറിച്ചിടട്ടെ...തോന്നലുകൾ ശരിയോ തെറ്റോ എന്നത് കാലത്തിനു വിട്ടുകൊടുത്തു കൊണ്ട്!

മോഡി പറഞ്ഞു അച്ഛാ ദിൻ വരുമെന്ന്;

പിണറായി പറയുന്നു എല്ലാം ശരിയാവും എന്ന്!

എല്ലാം ശരിയായാൽ പിന്നെ അച്ഛാ ദിൻ തന്നെ, അല്ലെ?!

മോഡി പറഞ്ഞു സബ് കാ സാഥ്, സബ് കാ വികാസ്; 

പിണറായി പറയുന്നു, 

എല്ലാവരുടെയും സർക്കാർ, എല്ലാവരുടെയും വികസനം എന്ന്!

മോഡി പറഞ്ഞു ഇന്ത്യയിൽ ഹിന്ദുക്കൾ അപകടത്തിൽ- രക്ഷിക്കാൻ BJP വരണം; 

പിണറായി പറഞ്ഞു, ന്യൂനപക്ഷങ്ങൾ അപകടത്തിൽ- രക്ഷിക്കാൻ  LDF തന്നെ വരണം!

മീഡിയ പറയുന്നു മോഡിയുടെ വാക്കാണ് BJP യുടെ വാക്കെന്നു;

അവർ തന്നെ പറയുന്നു, LDF ന്റെ അന്തിമവാക്ക് പിണറായിയുടേതെന്നു! 

എല്ലാരും പറയുന്നു, പിണറായി പറഞ്ഞത് ചെയ്തു കാണിക്കുന്ന ആളെന്ന്;

എല്ലാരും പറഞ്ഞു- മോഡിയുടെ ഗുജറാത്തും അങ്ങിനെ ആയിരുന്നെന്നു!

മോഡി പറഞ്ഞു- മോഡി മോഡി മോഡി...

പിണറായി പറയുന്നു, full page പരസ്യങ്ങളിലൂടെ- പിണറായി വിജയൻ, പിണറായി വിജയൻ

എത്ര വേഗം ആണ് LDF സർക്കാർ പോയി പിണറായി വിജയൻ സർക്കാർ വന്നത്?  

മോഡിക്ക് രണ്ടു ജന്മദിനങ്ങൾ- ഒന്ന് ഒറിജിനൽ, ഡിഗ്രി സെർറ്റിഫിക്കറ്റിൽ മറ്റൊന്ന് ;

ഇപ്പോൾ പിണറായിക്കും രണ്ട്- ഒന്ന് ഒഫീഷ്യൽ, മറ്റൊന്ന് ലഡ്ഡു കൊടുക്കാൻ!

അദ്വാനിക്ക് മോഡി കൊടുത്തു ഒരു മാർഗ്ദർശക് മണ്ഡൽ;

VS നു പിണറായി കൊടുത്തു, ഒരു കേരള കാസ്ട്രോ പട്ടം!

കേരളത്തിന്‌ കിട്ടി ഒരു കേരള കാസ്ട്രോ, 

ഒപ്പം കിട്ടിയത് ഒരു (#MalluModi) കേരള മോഡിയോ?! 

അങ്ങിനെ ആവാതിരിക്കട്ടെ....... 

അരുവിക്കരയിലെ കിട്ടാത്ത മുന്തിരി....

അരുവിക്കരയിൽ CPM നു പറ്റിയ പരാജയത്തെ മനസ്സിലാക്കാൻ വൈരുദ്ധ്യാത്മക ഭൌതികവാദമോ താത്വിക വിശകലനമോ ഒന്നും ആവശ്യമില്ല. ആ പാർട്ടിയുടെ കേരളത്തിലെ ഇന്നത്തെ ഏറ്റവും ഉന്നതരായ രണ്ടു നേതാക്കന്മാരുടെ പ്രസ്താവനകൾ (വരികൾക്കിടയിൽ) വായിച്ചാൽ മാത്രം മതി. 

പിണറായി തൻറെ വായ തുറക്കാൻ ഫലം വരുന്നത് വരെ കാത്തിരിന്നു. ഒരു പക്ഷെ, ലോകസഭ തിരഞ്ഞെടുപ്പിലെ പരനാറി പ്രയോഗത്തിന്റെ ഓർമ്മകൾ ആവാം കാരണം. എന്നാൽ അച്യുതാനന്ദൻ എന്ന 'പാർട്ടി വിരുദ്ധനു' ക്ഷമ എന്നൊന്ന് തീരെ ഇല്ലാത്തതിനാൽ അത്ര കാത്തിരിക്കാനൊന്നും വയ്യ. തൻറെ വായിലെ വികട സരസ്വതിയെ അദ്ദേഹം കയറൂരി വിട്ടു, അരുവിക്കരയിൽ. ആറാട്ട് മുണ്ടന്റെയും സരിതയുടെ കിടപ്പറയുടെയും വിവരണങ്ങൾ വോട്ട് നേടാൻ പര്യാപ്തമെന്നു അദ്ദേഹം കരുതിപ്പോയി. 

യാഥാർത്ഥ്യം ബോധ്യപ്പെടാൻ അല്പം സമയമെടുത്തു രണ്ടു പേർക്കും. ഫലം പ്രഖ്യാപിച്ചപ്പോൾ മനസ്സിലായി, നെറികെട്ട ഒരു കൂട്ടം മൂരാച്ചികളെ ആണ് ഇത്രയും ദിവസം വോട്ടിനായി കാലു പിടിച്ചതെന്ന്. അരുവിക്കരക്കാർ ജാതി നോക്കി വോട്ടു ചെയ്യുന്ന, അഴിമതിപ്പണത്തിൽ  പങ്കു പറ്റുന്ന, UDF കൊടുക്കുന്ന കൈക്കൂലി വാങ്ങി കീശയിലിട്ടും മദ്യം വാങ്ങിക്കുടിച്ചും വോട്ടു വില്ക്കുന്ന, മതമേലാളൻമാർ പറയുന്ന കക്ഷിക്ക് വോട്ടു ചെയ്യുന്ന, വിഴിഞ്ഞം പോലുള്ള വൻ അഴിമതിക്ക് വേണ്ടി ഉമ്മൻചാണ്ടിക്ക് കൂട്ട് നിൽക്കുന്ന, വെറും മൂരാച്ചികൾ ആണെന്ന തിരിച്ചറിവ് അല്പം വൈകിപ്പോയി സഖാക്കൾക്ക്!

എന്തൊക്കെ ചെയ്തു ഇവർക്കായി? സായുധ വിപ്ലവത്തിന്റെ തൊട്ടടുത്ത്‌ എന്ന് പറയാവുന്ന അസ്സംബ്ലി വളയൽ സമരം, ഭാരതത്തിന്റെ ഭരണഘടനയെപ്പോലും ചോദ്യം ചെയ്യുന്ന വിധത്തിൽ നടത്തിയില്ലേ? കൊടി സുനിയും കുഞ്ഞനന്തനും പോലുള്ള സഖാക്കൾ ജയിലിൽ കഴിഞ്ഞു ത്യാഗം സഹിക്കുന്നതു ഇവർക്കു വേണ്ടി അല്ലെ? ഏറ്റവും ഒടുവിൽ രണ്ടു സഖാക്കൾ ബോംബു നിർമാണത്തിനിടയിൽ നടന്ന സ്ഫോടനത്തിൽ രക്ത സാക്ഷികൾ ആയതും ഈ വോട്ടർമാരെന്ന മൂരാച്ചികൾക്ക് വേണ്ടി തന്നെ അല്ലെ?  എത്ര ഹർത്താലുകൾ നടത്തി ഇവർക്കു വേണ്ടി? മുഖ്യമന്ത്രിയെ പോലും കല്ലെറിഞ്ഞില്ലേ? ഏതോ ബൂർഷ്വാ കള്ളുമുതലാളി പറഞ്ഞ ഉടനെ തെളിവ് പോലും ഇല്ലാതെ ബാർ അഴിമതി എന്നും പറഞ്ഞു സംസ്ഥാനത്തിന്റെ ബജറ്റ് അവതരണം പോലും തടയാൻ ശ്രമിച്ചതും ആർക്ക് വേണ്ടി ആയിരുന്നു?  നിയമസഭ വരെ തല്ലി തകർത്തു. എന്നിട്ടും എന്തെ ഇവർ ഇങ്ങനെ ആയിപ്പോയി? നന്ദി ഇല്ലാത്ത വർഗം!

ഇനി ഇപ്പോൾ പഞ്ചായത്ത് തെരെഞ്ഞെടുപ്പും നിയമസഭ തെരെഞ്ഞെടുപ്പും ഒക്കെ വരാൻ പോവുന്നു. മൂരാച്ചികൾ അരുവിക്കരയിൽ മാത്രമല്ല, ഈ കേരളം മുഴുവൻ ഇങ്ങിനെതന്നെ. ഇവരൊന്നും ഗുണം പിടിക്കത്തില്ല. നമ്മുടെ പാർട്ടി തോറ്റെന്നു വരും, അത് സാരമില്ല. ബംഗാളിൽ ഇതിലും വലിയ തോൽവി നാം കണ്ടതാണ്. നമ്മൾ കുറേക്കാലം ഭരിച്ചിട്ടും അവിടുത്തെ ജനങ്ങളെ മൂരാച്ചികൾ ആവുന്നതിൽ നിന്നും തടയാൻ കഴിഞ്ഞില്ല. ഇവിടെയോ, ഈ UDF-  കാർ ഓരോ അഞ്ചു വർഷം കൂടുന്തോറും അഴിമതിപ്പണവും മദ്യവും നല്കി ഇവിടുത്തെ ജനങ്ങളെക്കൊണ്ട് വോട്ടു ചെയ്യിച്ചു നമ്മുടെ ശ്രമങ്ങൾ എല്ലാം വെറുതെ ആക്കും!  പിന്നെ, ഏക ആശ്വാസം ഓരോ അഞ്ചു വർഷം കഴിയുമ്പോഴും UDF ഈ പരിപാടി മറന്നു പോയിരുന്നു എന്നത് മാത്രം. UDF ന്റെ മദ്യവും പണം കിട്ടാതെ വരുമ്പോൾ ജാതി ചിന്തകളും മതചിന്തകളും മറന്നു ഈ മൂരാച്ചികൾ പ്രബുദ്ധരാവും, അങ്ങിനെ LDF നു വോട്ടു ചെയ്യും. ഇപ്പോൾ പേടി ആ ഉമ്മൻചാണ്ടി മറവി തീരെ ഇല്ലാത്തവൻ ആണെന്നതാണ്. അഴിമതിയിലൂടെ ധാരാളം പണവും ഉണ്ട്. വിഴിഞ്ഞത് മാത്രം 6000 കോടിയിൽ അധികം കീശയിൽ ആക്കിയില്ലേ? ഇതെല്ലം വാരിക്കോരി കൊടുത്തു എല്ലാ മൂരാച്ചികളെക്കൊണ്ടും വോട്ടു ചെയ്യിച്ചു വീണ്ടും UDF തന്നെ അധികാരത്തിൽ വന്നാൽ ഈ മൂരാച്ചികളുടെ കാര്യം എന്താവും എന്നാണ് പേടി!

കൈരളിയുടെ സർവ്വേ പറഞ്ഞു സ്ത്രീകൾ കൂടുതൽ വോട്ടു ചെയ്തത് UDF നാണു എന്ന്. തങ്ങളുടെ ഭർത്താക്കന്മാർക്ക് വൈകുന്നേരം സ്വസ്ഥമായി ഇരുന്നു അല്പം കള്ളു മോന്താനുള്ള സൌകര്യം പോലും ഇല്ലാതാക്കിയ ഇവർക്കു തന്നെ വോട്ടു ചെയ്യണമായിരുന്നോ? ഞങ്ങൾ വന്നാൽ ഈ കേരളം മുഴുവൻ വീണ്ടും ബാർ തുറന്നു തരില്ലായിരുന്നോ? ബിജു രമേശ്‌ പോലും ഞങ്ങളെ വിശ്വസിച്ചു, എന്നിട്ടും ഈ അരുവിക്കരയിലെ പെണ്ണുങ്ങൾ-കഷ്ടം!

അതുകൊണ്ട് അല്പം കടന്ന തെറി തന്നെ വിളിക്കേണ്ടി വന്നാലും ഉടനെ ഈ മൂരാച്ചികളെ പറഞ്ഞു മനസ്സിലാക്കി മാറ്റി എടുത്തേ പറ്റൂ! ചൊല്ലിക്കൊടുതാൽ പഠിക്കാത്തവന് തല്ലികൊടുക്കാനും, പിന്നെ തല്ലിക്കൊല്ലാനും അറിയാഞ്ഞിട്ടല്ല,  ജനാധിപത്യം ആയിപ്പോയില്ലേ! 

അല്ലാതെ വെറുതെ എന്നെ തല്ലണ്ടമ്മാവ, ഞാൻ ഇനി എന്ത് നന്നാവാനാ?!